Skip to content

Kristján Gíslason

Kristján Gíslason
Kristján Gíslason
f. 01.09. 1921 d. 07.08. 1999

Kynni Kristjáns Gíslasonar, frá Sellátrum við Tálknafjörð, af fluguveiði hófust upp úr 1960. Stuttu síðar hitti hann norskan fluguhnýtingarmann, Analíus Hagvag, er hann kom hingað til lands og sýndi og kenndi fluguhnýtingar. Eftir þau kynni varð ekki aftur snúið.

Frá árinu 1965 hnýtti Kristján Gíslason og hannaði hárflugur, fyrstur Íslendinga. Alls hannaði Kristján um 100 laxaflugur á sínum 35 ára ferli sem fluguhnýtingamaður og hönnuður.

Allt frá blautu barnsbeini var Kristján sannkallað náttúrubarn. Ólst upp í óspilltri íslenskri náttúru vestur á fjörðum og bar ómælda virðingu fyrir henni allt til dauðadags. Umhverfissinni var Kristján meiri en margir aðrir og eftir hann liggja margar blaðagreinar um umhverfismál auk þriggja bóka um fluguveiði. Hann barðist áratugum saman gegn þeim öflum er buðu náttúrunni byrginn og segja má að hann hafi verið sannur náttúruverndarsinni.

Kristján sat um tíma í Veiði- og fiskiræktarráði Reykjavíkurborgar og bar hag Elliðaánna ekki síst fyrir brjósti. Ofbauð honum lengi það áhuga- og framtaksleysi er menn sýndu þessari fyrrverandi perlu Reykjavíkur. Á krafla.is verða í framtíðinni birt skrif eftir Kristján er tengjast náttúruvernd og umhverfismálum.

Á ferli sínum sem fluguhönnuður og fluguhnýtingamaður hnýtti og hannaði Kristján ótrúlegt magn laxaflugna. Ekki er ofsagt að hann hafi á æviskeiði sínu sem fluguhnýtingamaður hnýtt 200-300 þúsund flugur, líkast til nær síðari tölunni.

Snemma varð ljóst að hugur Kristjáns stóð ekki til framleiðslu klassískra laxaflugna af erlendu bergi. Sjálfur hannaði hann yfir eitt hundrað flugur og nefndi þær jafnan íslenskum nöfnum. Aðeins hefur tæplega helmingur þessara flugna komið fyrir augu veiðimanna og áhugamanna um fluguveiði.

Kristján þótti afar vandvirkur fluguhnýtari. Flugur hans höfðu orð á sér fyrir að vera sérlega vel hnýttar, fallegar og sterkar.

Þrjár bækur um fluguveiði skrifaði Kristján. ,,Af Fiskum og flugum” sem kom út árið 1990, ,,Og áin niðar” sem kom út 1992 og loks ,,Ofurlaxar” en hún kom út árið 1997. Bækur þessar eru nú ófáanlegar í verslunum. Við munum í framtíðinni birta kafla úr þessum bókum Kristjáns á Krafla.is

Kristján Gíslason er þekktur víða erlendis og það sama má segja um nokkrar af flugum hans. Fjallað hefur verið um flugur hans í mörgum erlendum bókum og tímaritum. Óhætt er að fullyrða að enginn íslenskur fluguhönnuður og fluguhnýtingamaður íslenskur hefur hlotið meiri virðingu erlendis en Kristján Gíslason. Krafla, hans þekktasta fluga, hefur meðal annars verið kosin fluga mánaðarins hjá hinu virta erlenda fluguveiðitímariti Trout & Salmon. Appelsínugulu Kröfluna hannaði Kristján árið 1977, tveimur árum eftir að eldsumbrotin á Kröflusvæðinu nyrðra hófust. Þaðan dregur flugan nafn sitt en síðar sama ár fylgdu aðrir litir Kröflunnar í kjölfarið.

Kristján stundaði stangaveiði í hálfa öld og fluguveiði mestan hluta þess tíma. Hann var afar laginn veiðimaður og vakti oft athygli fyrir það hversu veiðinn hann var og iðinn. Síðustu áratugina veiddi hann eingöngu á sínar flugur. Sína eigin hönnun. Alls veiddi Kristján rúmlega 1000 laxa á sínum ferli sem veiðimaður og mjög margir þeirra voru rígvænir. Stærsta lax sinn veiddi Kristján austur við Iðu í Biskupstungum og vó hann 26 pund. Í það minnsta tvo 24 punda fiska og mjög marga fiska sem voru á bilinu 20-23 pund. Alls veiddi Kristján á annað hundrað laxa sem voru 20 pund eða stærri. Undir það síðasta hafði Kristján ekki síður gaman af að sýna bleikjum flugur sínar en löxum. Kom þá í ljós, betur en áður, að flugur hans voru ekki síður gott agn í bleikjuveiði en laxveiði.

Kristján fór í sína síðustu veiðiferð um sumarið 1999. Afar veikburða, eftir baráttu við erfiðan sjúkdóm, landaði hann fallegri bleikju. Og auðvitað á appelsínugulu Kröfluna. Kristján lést tveimur dögum síðar í Reykjavík.

Í netverslun okkar á nýrri vefsíðu fyrir fluguveiðimenn, www.Krafla.is verða í framtíðinni kynntar margar flugur eftir Kristján sem aldrei hafa verið til sölu áður á Íslandi. Og það sem kann að gera þetta sérlega forvitnilegt fyrir áhugasama fluguveiðimenn er að allar þessar flugur hafa sannað sig sem gjöfular veiðiflugur í íslensku straumvatni. Þær rúmlega fimmtíu flugur, af um eitt hundrað sem Kristján hannaði, og aldrei hafa verið framleiddar til sölu í íslenskum veiðibúðum, verða kynntar í framtíðinni á vefsíðunni okkar og boðnar til sölu á netversluninni á www.Krafla.is

Tilgangur okkar með opnun vefsíðunnar www.Krafla.is á Íslandi og www.Krafla.com erlendis auk netverslunarinnar er fyrst og fremst sá, að sýna Kristjáni Gíslasyni þá virðingu sem honum ber, halda nafni hans sem hæst á lofti í framtíðinni og bjóða fluguveiðimönnum hér heima og erlendis upp á afrakstur ævistarfs þessa merka fluguveiðimanns, fluguhnýtingamanns, fluguhönnuðar og náttúrubarns.

Blessuð sé minning Kristjáns Gíslasonar.